Allt á suðupunkti í málfundafélagi Oxford háskóla

Flestar sjónarpstöðvarnar hérna hafa verið með beina útsendingu frá Oxford í tilefni af umdeildum fundi málfundafélagsins Oxford Union. Í kvöld áttu tveir umdeildir gestir að taka þátt í rökræðum. Annar þeirra er David Irving, sagnfræðingur, sem frægur er fyrir að halda því fram að helför gyðinga hafi ekki átt sér stað í seinni heimstyrjöld, og sat reyndar um tíma í fangelsi fyrir yfirlýsingar sínar þar að lútandi. Gríðarlegur fjöldi fólks kom sér fyrir til þess að mótmæla komu Irvings og að lokum stormuðu mótmælendurnir byggingu Oxford Union. Rökræðurnar hafa því enn ekki farið fram en Irving er enn staddur í byggingunni.

Þetta gerist á sama tíma og viðfangsefni mitt í samanburðarmannréttindum er tjáningarfrelsið. Ég get því ímyndað mér hvert umræðuefnið verður í tímanum á föstudaginn.

Þeir sem mótmæla komu David Irvings benda á að það eigi ekki að bjóða hverjum sem er að tala á fundum Oxford Union. Með því að bjóða Irving sé ekki bara verið að gefa honum tækifæri til að útbreiða boðskap sinn heldur um leið verið að veita honum ákveðna viðurkenningu með því að tengja hann við Oxford. Aðeins fáum einstaklingum sé boðið að tala á málfundum félagsins og að vanda eigi valið.

Formaður félagins vísar hins vegar til klassískra sjónarmiða um gildi málfrelsisins. Hann segir að með því að banna mönnum eins og Irving að tala sé með vissum hætti verið að gera þá að píslarvottum. Rétta leiðin sé að rökræða við þá og afhjúpa kenningar þeirra og hatursboðskap.

Ég er út af fyrir sig sammála sjónarmiðum formannsins. En þótt það eigi ekki að banna mönnum eins og David Irving að halda ræður og gefa út bækur, þýðir það ekki að Oxford Union þurfi að búa til vettvang handa þeim.

En til vitnis um breiddina í ræðumönnum Oxford Union, þá má nefna meðal gesta undanfarin misseri hafa verið Michael Jackson, Morgan Freeman... og já, á miðvikudaginn kemur Geir Haarde.

Já, forsætisráðherrann okkar er á leiðinni og við Íslendingarnir í skólanum erum boðnir í móttöku fyrir kappann. Það verður vonandi léttari stemmning yfir liðinu hér í Oxford þá.

 

Athugasemdir

[Rúnar Ingi Einarsson (IP-tala skráð) 27.11.2007 kl. 15:02]

Hægan hægan. Með fullri virðingu fyrir Geir H. Haarde og hvað þá Morgan Freeman, þá nefniru ekki Michael Jackson í sömu upptalningu eins og ekkert sé sjálfsagðara að kauði kíki í heimsókn. Fær maður ekki söguna? Tók hann Man in the Mirror?

Þakka ykkur samt fyrir mjög skemmtilegt blogg. Hlakka til að sjá ykkur.

[Gunnhildur (IP-tala skráð) 29.11.2007 kl. 15:55]

Stuð og læti. Irving, Jackson og Haarde, allt hressir kappar. En já hvað tjáði Jackson sig um? Gaman að þessu.

[Haukur Örn Birgisson (IP-tala skráð) 29.11.2007 kl. 16:45]

Ég geri ráð fyrir að Jackson hafi flutt lærðan fyrlestur á sviði barnaréttar.

kv.

Hawk Eagle